?

Log in

No account? Create an account

Previous Entry | Next Entry

АКАФИСТ ПРЕПОДОБНОМУ НИКОНУ РАДОНЕЖСКОМУ



Кондак 1

Великого строителя Лавры Богоносного Сергия достойными похвалами ублажим преславно. Ты же, яко добрый любителю благолепия, приими от нас сицевое с любовию тебе приносимое пение: Радуйся Никоне, Церкви Российстей украшение.

Икос 1

Ангелу пустынному подражателю, к Сергию, отцу твоему, притекл еси и до конца верен заветам его пребыл еси, тем же поминай нас, в веселии зовущих ти: Радуйся Никоне, избегший житейских попечений. Радуйся, добрый послушателю отеческих учений. Радуйся, корень зла в себе победивый. Радуйся, крин благочестия в сердце своем возрастивый. Радуйся, Никоне, Церкви Российстей украшение.

Кондак 2

Видя в родителях своих доброе благочестие и веры православныя твердое исповедание, яко чадо их возлюбленное, воспевал вкупе с ними: Аллилуиа!

Икос 2

Разум добр стяжав в себе, плоды благочестивого воспитания вскоре, в младом возрасте, явил еси, кротостью и смирением Богу угождая. Сим добродетелям твоим подражая, сих добродетелей достигнути желая, велегласно зовем: Радуйся, добрая отрасле родителей благочестивых. Радуйся, еще в юности сад Христу в сердце своем насадивый. Радуйся, иноческий путь на земли избравый. Радуйся, прелести мира сего поправый. Радуйся, Никоне, Церкви Российстей украшение.

Кондак 3

Силою свыше умудренный, к подвижнику великому пришел еси и к стопам его припал еси, умоляя его, дабы единым сердцем пети с ним песнь Господу: Аллилуиа!

Икос 3

Имея от Бога дар прозрения, Сергий преподобный, отец твой духовный, узрев в тебе искреннее излияние души твоея, повеле к ученику своему Афанасию в обитель его шествовати и в ней иноческому житию поучатися. Мы же на сем пути твоем зовем: Радуйся, сердце свое преподобному отцу открывый. Радуйся, душу свою в послушание ему приклонивый. Радуйся, ревностным иноком себе явивый. Радуйся, радость небесную получивый. Радуйся Никоне, Церкви Российстей украшение.

Кондак 4

Бурю житейских помышлений презрев, сан иерея воспринял еси, в новом подвизе своем всерадостно воспевая сердцем и устны: Аллилуиа!

Икос 4

Слыша о твоем добром житии, по двоих летех преподобный отец твой Сергий возжела видети тя и с радостию прияв, в единой келии с собою жити повеле, благодатию сердце твое к совершенству уготовляя, мы же вас вкупе, яко единых, прославляем: Радуйтеся, добрии добродетелей подвижницы. Радуйтеся, душ своих в храм Божий устроители. Радуйтеся, Христовых совершенств достизатили. Радуйтеся, Ангельского жития подражатели. Радуйтеся, отцы наши Сергие и Никоне, Церкви Российстей славо и украшение.

Кондак 5

Боготечною рекою духовная дарования источающе, вся к полезному наставляюще, Сергие и Никоне преподобнии, песнь Богу воспевали есте: Аллилуиа!

Икос 5

Видевше доброго себе помощника в попечении о братии, учитель твой Сергий Преподобный, избра тя и постави игуменом обителя своея, ты же, Никоне всеславный, безмолвие возлюбивый, токмо воле отца повинуяся, приял еси бремя трудов его, того ради зовем: Радуйтеся, искреннии наши наставницы. Радуйтеся, славнии домов Божих строителие. Радуйтеся, сокровищ духовных обладателие. Радуйтеся, монашествующих собирателие. Радуйтеся, отцы наши Сергие и Никоне, Церкви Российстей славо и украшение.

Кондак 6

Проповедник Божественных учений был еси, Никоне преподобне, в церкви братию поучая пети всегда: Аллилуиа!

Икос 6

Возсияв миру светом Евангельского благочестия, к миру Ангельскому преставися учитель твой, Никоне преподобне, ты же, скорбию исполненный, приими от нас, яко от общников печали твоея, песнопения сия: Радуйтеся, преподобнии Сергие и Никоне, истиннии друзи Христови. Радуйтеся, вернии исполнителие заповедей Его. Радуйтеся, добрии делателие вертограда Его. Радуйтеся, блаженнии наследницы горения славы Его. Радуйтеся, отцы наши Сергие и Никоне, Церкви Российстей славо и украшение.

Кондак 7

Хотя добре исполнити служение твое, любовь отеческую к братии изливал еси, яко миро всюду благоуханное, воздвизая всех пети: Аллилуиа!

Икос 7

Дивно являл еси в житии твоем многия труды твоя, еще и словом поучения монашествующих наставляя, како жити им по воле Творца своего; за сию ревность делания твоего приими похвалу сию: Радуйся, добрый пастырю овец своих. Радуйся, преподобного Сергия достойный преемниче. Радуйся, твердый исполнителю его велений. Радуйся, любимый посреде монашеских селений. Радуйся Никоне, Церкви Российстей украшение.

Кондак 8

Странно безмолвия любителю обителью иноков управляти и игуменом братии быти и по шести летех на подвиг совершенного уединения, преподобне отче, устремитися, да единою душею неразлучно Богу предстоя, вопити ему: Аллилуиа!

Икос 8

Весь горе возвысися и созерцая сердцем неизреченная и преславная, не можаше отринути моление братии: «Попекись и о спасении ближних твоих» с любовию приял паки бремя трудов в обители; сих ради и мы паки зовем ти: Радуйся, скорый послушателю верных молений. Радуйся, теплый ходатаю наших прошений. Радуйся, горе предстоящий. Радуйся, доле усердием горящий. Радуйся Никоне, Церкви Российстей украшение.

Кондак 9

Вся братия обители Святыя Троицы печали исполнися, егда хан Эдигей опустоши землю Российскую и к обители их приступи, токмо молитвами Никона, игумена своего, не остави пети песнь: Аллилуиа!

Икос 9

Ветии многовещаннии недоумевают, что глаголати о пречудном видении преподобного, егда святители Московские Петр и Алексий, а с ними и преподобный Сергий, явишася и рекоша ему: «Угодно сие Господу, да коснутся сего места иноплеменницы, но не скорбите и не смущайте сердец ваших: искушение скоре прейдет и обитель не токмо не запустеет, но более еще расцветет». За сие откровение тебе достойно воспеты похвалы сия: Радуйся, Никоне, молитвенниче теплый и преизрядный. Радуйся, бодрственный пастырю и преизящный. Радуйся, откровений Божиих зрителю. Радуйся, будущих, яко настоящих созерцателю. Радуйся, Никоне, Церкви Российстей украшение.

Кондак 10

Спасти хотя святыни некия, удалился еси временне с братиею своею из обители и в изгнание, не престая с надеждою воспевати Богу: Аллилуиа!

Икос 10

Царь Превечный, Утешитель, Троица Пребожественная, не даде погибнути месту избранному и по удалению Эдигея с полчищами, превратившего всю обитель в развалины, возвратися преподобный с братиею и начат восставляти обитель своего чудного наставника. За сию ревность пламенную и за великое множество трудов твоих, приими, всеблаженне Никоне, песнь сию, тебе к возносимую: Радуйся, возлюбленное чадо Святыя Троицы. Радуйся, избранный сосуде Божественного промышления. Радуйся, многия скорби претерпевый. Радуйся, от них же Господом избавивыйся. Радуйся Никоне, Церкви Российстей украшение.

Кондак 11

Пение всеумиленное приносим тебе, преподобне, яко по триех летех через тя исполнишася пророческое проречение отца твоего духовного и обитель, яко крин, процвете на месте опустошения и все множество иноков воспеша благодарственную песнь Господу: Аллилуиа!

Икос 11

Светоподателя узрев в тебе Церковь Российская, яко сподобися обрести и на свещнице мира мощи святыя отца твоего Богоносного Сергия поставити, и над ними храм Живоначальней Троице воздвигнути, и живописью лучшею украсити его. За сия труды твоя приими от недостойных уст славословие: Радуйся, яко сподобился еси узрети и миру всему явити святаго тела Сергиева нетление. Радуйся, через сие громогласне проповедавый таинство воскресения. Радуйся, Пасху вечную миру явивый. Радуйся, строителю Церкви Божией и украсителю. Радуйся Никоне, Церкви Российстей украшение.

Кондак 12

Благодать подаждь ми Господи, да воспою достойно угодника Твоего, научающа всех пети: Аллилуиа!

Икос 12

Поюще житие твое, отче преподобие, восхваляем и скончание твое, како поучая братию «держати веру правую и житие благочестиво» умолк и в радости воскликнул еси: «Отнесите мя в храмину светлую, уготованную мне молитвами отца моего», и, оградив себя крестным знамением, душу свою Богу предал еси, тем же мы, вечно тебе благодарни суще, благоговейно поем: Радуйся, светильниче веры и благочестия. Радуйся, луче света невечернего. Радуйся, наследниче жизни вечныя. Радуйся, радосте наша и похваление. Радуйся Никоне, Церкви Российстей украшение.

Кондак 13

О, великий угодниче Божий, друже Сергиев и сожителю всем святым, не престай посещати нас, любовию поминающих тя, подавая требующим исцеление и миру всему утешение, да с радостию всегда вопием: Аллилуиа, Аллилуиа, Аллилуиа!