ierokirik (ierokirik) wrote,
ierokirik
ierokirik

Category:

Акафист блаженному Даниилу Елисаветградскому

Выкладываю текст отредактированного акафиста в честь блаженного старца Даниила
Кондак 1
Избранный угодниче Христов и предивный о нас молитвенниче, Елисаветграда похвало и заступление, блаженне отче Данииле! Величающе прославльшаго тя Господа, хвалебное пение приносим ти, чтущии святую память твою. Ты же, яко имеяй велие дерзновение ко Господу, от всяких нас бед свободи, да зовем ти: Радуйся, Данииле блаженне, земли Елисаветградския похвало и утвержение.
Икос 1
Ангелов Творец призва тя, всечудне Данииле, на крестный путь терпения, лишения и злострадания, да освятиши богоугодным житием твоим град, в честь святыя праведныя Елисаветы воздвигнутый. Мы же таковому промышлению Вседержителя дивящеся, с радостию вопием ти сице:
Радуйся, светильниче праведности богоизбранный,
Радуйся, подвижниче благочестия всепрославленный;
Радуйся, града праведныя Елисаветы всемощное заступление,
Радуйся, земли нашея всечудное просвещение;
Радуйся, на стезю юродства Христа ради добровольно возшедый,
Радуйся, в месте погребений яко в пустыни безлюдней вселивыйся;
Радуйся, во дни праздников церковных псалмы воспевавый,
Радуйся, ношением власяницы и креста плоть свою умертвивый;
Радуйся, Данииле блаженне, земли Елисаветградския похвало и утвержение.
Кондак 2
Видяще людие странное твое житие, безумнаго тя мняху, но ты, имеяй разум просвещенный Духом Святым, среди моря житейскаго подвиг дивный кротко совершал еси, воспевая на всякое время благодарственную песнь Богу: Аллилуиа.
Икос 2
Разум просвещенный даровася тебе, угодниче Божий, егда подвигом и усердием своим мертвым для мира явился еси, жив суще в Дусе Святе, имже всяка душа живится, во вся дни и нощи молитвы Богу возносил еси. Мы же таковому твоему жительству дивящеся воспеваем ти сице:
Радуйся, Божиих дарований исполненный,
Радуйся, благодатию Господнею осененный;
Радуйся, столпе недвижимый благочестия,
Радуйся, всеславное посрамление злочестия,
Радуйся, юродством обилие благодати в себе сокрывый,
Радуйся, постом и молитвою дар чудотворений стяжавый;
Радуйся, росою неботочною жаждущих напаявый,
Радуйся, плодами благодати притекавших к тебе питавый;
Радуйся, Данииле блаженне, земли Елисаветградския похвало и утвержение.
Кондак 3
Силою, данною ти свыше, созерцал еси сокровенную тайну человеческаго прехождения по смерти от временной жизни к вечной и сия безвестныя премудрости Божия миру явил еси, да, помняще последняя своя, вси от греха удаляются и в покаянии непрестанно взывают ко Господу: Аллилуиа.
Икос 3
Имея желание всеусердное Господу Своему поработати, восприял еси образ безумия мнимаго, да уразумеют вси, яко мудрость мира сего безумие есть пред Богом, и вся искушения и соблазны врага вселукаваго преоборол еси, сего ради похвалы сицевыми ублажаешися:
Радуйся, божественныя мудрости взыскавый,
Радуйся, небеснаго знания возжелавый;
Радуйся, лику спасаемых сопричтенный,
Радуйся, житием добротетельным светло украшенный;
Радуйся, мира суету и страстей течение отринувый,
Радуйся, чистоту и богомыслие паче всяческих возлюбивый;
Радуйся, стопы человеческия на стезю покаяния направляющий,
Радуйся, нас на борьбу со страстями и прилоги вражиими подвигающий;
Радуйся, Данииле блаженне, земли Елисаветградския похвало и утвержение.
Кондак 4
Бурю злых напастей и досаждений от людей неверующих и духов злобы поднебесной, на тя, отче преславне, воздвизаемую, кротостию и незлобием победил еси и на пользу ближних обратил еси, наставляя всех о Горнем помышляти и усердно Богу воспевати: Аллилуиа.
Икос 4
Слышав о славнем твоем чудеси вразумления заблудшего и к покаянию и вере Православней сего обращению, люди града святыя Елисаветы зело удивишася. Мы же с верою и любовию восхваляем тя, блаженне отче Данииле, и вопием ти сице:
Радуйся, любви отеческия откровение,
Радуйся, промысла Божия всечудное совершение;
Радуйся, звездо пресветлая неба церковнаго,
Радуйся, цвете всеславный вертограда небеснаго;
Радуйся, словеса велеречивыя от неверующего кротко приявый,
Радуйся, вразумления заблудшему у Бога испросивый;
Радуйся, сухую ветвь дивно весенним цветом ожививый,
Радуйся, чудом сим заблудшего к покаянию наставивый;
Радуйся, Данииле блаженне, земли Елисаветградския похвало и утвержение.
Кондак 5
Боготечная звезда явился еси блаженне Данииле людем, сущим в Елисаветграде, егда по усердному прошению твоему Всещедрый Господь дарова им источник воды благодатный, не токмо жажду утоляющий, но телесем здравие подающий, да вси, воду сию приемлющие, к Богу песнь благодарственную воспоют: Аллилуиа.
Икос 5
Уведев, блаженне отче Данииле, в печали и скорби людей, близ себе живущих, яко не имут источника воднаго, подъял еси Христа ради и любви к ближним подвиг многотрудный, мы же со умилением сердца зовем ти:
Радуйся, чудес источниче неистощимый,
Радуйся, знамений кладезе неисчерпаемый;
Радуйся, источник воды целебныя у Бога испросивый,
Радуйся, многая исцеления тою совершивый;
Радуйся, на камени аки столпник молитвы возносивый,
Радуйся, о милости ко Творцу три дня и три нощи взывавый;
Радуйся, сердца наша питием благочестия напояющий,
Радуйся, души наша благодатию Божиею просвещающий;
Радуйся, Данииле блаженне, земли Елисаветградския похвало и утвержение.
Кондак 6
Проповедует мир весь подвиги и труды твоя, яко и место погребений молитвами твоими, аки фимиамом кадильным, облагоухал еси, и людем в скорби сущим утешения испросил еси, наставляя их немолчно пети Богу: Аллилуиа.
Икос 6
Возсиял еси яко свеща многосветлая, на высокий свещник служения ближним Господом вознесенная, да житием и подвигом твоим свéтиши всем, взывающим ти сице:
Радуйся, светом небесным озаренный,
Радуйся, благодатию Божией освященный;
Радуйся, правды Христовой ревнителю,
Радуйся, Евангельския любве служителю;
Радуйся, града праведныя Елисаветы основание,
Радуйся, земли нашея утверждение;
Радуйся, от падений греховных нас ограждающий,
Радуйся, на путь правды нас премудре наставляющий;
Радуйся, Данииле блаженне, земли Елисаветградския похвало и утвержение.
Кондак 7
Хотяй прославити Бога и всея твари Содетеля, добрый подвиг совершил еси и крест мнимаго буйства Христа ради до конца понесл еси и пришел еси к жизни вечней, идеже со ангелы и всеми святыми поеши радостную песнь Богу: Аллилуиа.
Икос 7
Новаго Иерусалима Небеснаго достигл еси отче, путем шествуя заповедей Христовых, егда на земли Богоугодно пожив, в вечные обители преселился еси, да будеши и тамо скорый ходатай о всех, память твою воспевающих и похвалы сицевыми тя ублажающих:
Радуйся, добродетельми светлоукрашенный,
Радуйся, венцем правды увязенный;
Радуйся, чистотою, аки крин сельный, процветший,
Радуйся, душею в Небесный чертог ангелами вознесенный;
Радуйся, небесных ликов похвало всерадостная,
Радуйся, христиан православных песнь всеславная;
Радуйся, в безумии мнимом премудростию просиявый,
Радуйся, житием богоугодным Елисаветград освятивый;
Радуйся, Данииле блаженне, земли Елисаветградския похвало и утвержение.
Кондак 8
Страннолюбия Владычня и безсмертныя трапезы на горнем месте Сиона вкусил еси, отче наш Данииле, странен на земли житием своим суще, и ныне к радости Пасхи Вечныя призываеши всех нас, пети научая Христу Господу ангельскую песнь: Аллилуиа.
Икос 8
Весь благодатию Божией облеклся еси, яко светлою ризою и боготканною, отче наш всеблаженне, темже и вшел еси непрепятственно во обители Небесныя, идеже предстоищи Престолу Всецаря Бога и мольбы присно приносищи всех благих Подателю о чадех твоих, память твою прославляющих и песньми тя сицевыми похваляющих:
Радуйся, непрестанно о всех молитвы приносящий,
Радуйся, о чадех твоих духовных присно ходатайствующий;
Радуйся, молитвы кадило благоуханное,
Радуйся, стено ограждения нерушимая;
Радуйся, яко предстательством твоим мир с Богом обретаем,
Радуйся, яко путем твоим к Небеси восходим;
Радуйся, по отшествии земнем чудеса творити не преставый,
Радуйся, Промыслом Божьим прославленный и возвеличенный;
Радуйся, Данииле блаженне, земли Елисаветградския похвало и утвержение.
Кондак 9
Все естество ангельское удивися, како по отшествии твоем от земнаго жития паки на служение страждущим людем от Господа призван был еси, отче Данииле, да всем ищущим спасения, яко светоч духовный сияеши, подвизая пети Богу: Аллилуиа.
Кондак 9
Ветия многовещаннии не могут изрещи высоту величия твоего, многая бо и славная чудеса и знамения от честных мощей твоих источаеши всем, верою ти припадающим и моления сицевыя приносищим:
Радуйся, спасения нашего споспешниче,
Радуйся, от лукавства духов злобы всемощный помощниче;
Радуйся, утешение нам присно низпосылающий,
Радуйся, благодатные дары от Господа подающий;
Радуйся, Православия утверждение,
Радуйся, злобы адския обличение;
Радуйся, Путем Господним присно ходивый,
Радуйся, многих от путей погибельных отвративый;
Радуйся, Данииле блаженне, земли Елисаветградския похвало и утвержение.
Кондак 10
Спасти хотяй многия люди и избавити от обдержащих их бед, скорбей и болезней, Всемилостивый Господь твоя мощи честныя источник неоскудевающий благодати явил есть, да помощь получивше, непрестанно вопиют благодарственную песнь Богу: Аллилуиа.
Икос 10
Стена еси всем человеком, отче Данииле, молитвенно к тебе прибегающим: скорбящим утешение, заблудшим вразумление, болящим исцеление и от духов злобы свобождение. Темже и нам, помощи твоея просящим, буди ограждение крепкое и стено необоримая, да вопием ти таковая:
Радуйся, скорбящих и обремененных по смерти не оставивый,
Радуйся, мощи своя честныя яко источник чудес и знамений нам явивый;
Радуйся, приходящим ко гробу твоему исцеления подающий,
Радуйся, окаменевших сердцем к покаянию наставляющий;
Радуйся, души верных от прелести греховной свобождающий,
Радуйся, Богоугодные прошения присно исполняющий;
Радуйся, от напастей и скорбей нас избавляющий,
Радуйся, от греховных язв нас исцеляющий;
Радуйся, Данииле блаженне, земли Елисаветградския похвало и утвержение.
Кондак 11
Пение всеумиленное приносят ти, отче Данииле, избавление приявщии молитвами твоими от бед, скорбей, и напастей, людие же Елисаветградстии, благодаряще Бога о даровании таковаго молитвенника и ходатая, выну взывают Подателю всяческих благ: Аллилуиа.
Икос 11
Светозарное Правды Солнце Христос Бог наш сущим во тме греховней дивное светило великое яви тя, отче всеблаженне, светом благодати Божия сияющее и путь доброделания всем освещающее, сего ради молимся: просвети сердца наша, страстьми омраченныя, да сподобимся пети ти:
Радуйся, нескончаемое веселие улучивый,
Радуйся, в Чертоги Небесныя невозбранно возшедый;
Радуйся, Царствия Христова наследниче,
Радуйся, вечныя Пасхи причастниче;
Радуйся, венцем нетленным от Господа увязеннный,
Радуйся, славою чудес твоих Елисаветград возвеличивый;
Радуйтеся, имже Православие утверждается,
Радуйтеся, имже всякая лесть отгоняется;
Радуйся, Данииле блаженне, земли Елисаветградския похвало и утвержение.
Кондак 12
Благодати Божия сосуде златокованный, адаманте всекрепкий веры Христовыя, на врагов оружие любви необоримое, Данииле всеблаженне, моление наше приими и молитвою твоею на путь спасения настави, да сподобимся во веки со ангелы воспевати: Аллилуиа.
Икос 12
Поюще Бога, Дивнаго во святых Своих, похвалы всяческия приносим ти, всеблажене и досточудне отче Данииле, молитвенниче о нас усердный и заступник наш всечудный, и единым сердцем величаем тя, глаголюще:
Радуйся, кадило молитвы, присно благоухающее,
Радуйся, звездо светозарная, верныя озараяющая;
Радуйся, угодниче Божий, от сна греховного нас восставляющий,
Радуйся, погибели вечной ходатайством твоими исхищающий;
Радуйся, смирением духов лукавых отгняющий,
Радуйся, от пути греховнаго многих отвращающая;
Радуйся, сосуде, благодатию Божиею исполненный,
Радуйся, Елисаветграду в ограду и помощь Богом дарованный;
Радуйся, Данииле блаженне, земли Елисаветградския похвало и утвержение.
Кондак 13
О, преславный угодниче Христов и предивный о нас молитвенниче, блаженне отче Данииле, прими малое сие моление наше, в похвалу тебе от нас, недостойных, приносимое, умоли Господа Бога да оградит град сей и землю нашу от глада, губительства, потопа, огня, меча, нашествия иноплеменников и междоусобные брани, от ересей и расколов церковных, да дарует мир и благоденствие державе нашей, и да избавит нас твоими молитвами от временных бед и вечныя муки, да в будущем веце купно с тобою и всеми святыми воспоим: Аллилуиа.

Сей кондак глаголи трижды. И паки чтется Икос 1 и Кондак 1.

МОЛИТВА
О, досточудне и всеблаженне отче наш Данииле, землю Елисаветградскую житием и подвиги своими освятивый и чудесы твоими людем православным помощь доныне обильно подающий. Прославляюще прославльшаго тя Господа, во святых Своих дивнаго, славословие тебе приносим и усердно молим тя: отче блаженне, молитвами твоими яже к Богу сохрани Град наш и Отчество от всякия беды и напасти, огради ходатайством твоим Церковь нашу Святую и умири всякое нестроение и соблазн, от врага всеваемый, даруй нам дух ревности и терпения, дух разума и любви, обнови страх Божий в сердцах наших и возгрей их пламенем непрестанныя молитвы. Ей, Данииле Богомудре, сохрани всех нас от соблазнов и грехопадений, от злобы и неправды, от искушений и страстей и вся люди православныя во исповедании отеческия веры укрепи, да купно с тобою и со всеми святыми прославим Всеблагаго Бога, Отца и Сына и Святаго Духа во веки веков. Аминь.
Tags: гимнография
Subscribe

  • (no subject)

    Наверное, одна из самых существенных проблем нашего богослужения - это перенесение акцента со слова на действие, с молитвословия на обряд, со смысла…

  • беседа на память св.ап. Петра и Павла

    12 июля Православная Церковь молитвенно почитает святых апостолов Петра и Павла – двух удивительных проповедников Евангелия, ставших символами…

  • беседа на собор Одесских святых

    Сегодняшний день – особый день для нашего города, для нашей епархии. Сегодня, в третье воскресенье после праздника святой Троицы все православные…

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments