ierokirik (ierokirik) wrote,
ierokirik
ierokirik

Category:

канон пред причащением иерея или архиерея

Канон
пред Божественной службой
Святейшей Евхаристии
архиереем или иереем чтомый
Глас 6.
Песнь 1. Ирмос: Сеченное сечется.
Припев: Сердце чисто созижди во мне Боже и дух прав обнови во утробе моей.
Благодатию Своею призвавый мя, недостойнаго, и сподобивый лику служителей Твоих сопричтену быти, ныне очисти мя, да, воздохнув от сердца, милостей Твоих причастник явлюся и воспою: славно прославися Христос Бог наш.
Припев: Не отвержи мене от Лица Твоего и Духа Твоего Святаго не отыми от мене.
Лицы ангельстии со страхом предстоят Престолу Твоему и, крилами огневидными закрывающеся, трепещут Святыни Твоея, аз же грешный како дерзну руце свои прострети и вместообразных коснутися и воспети Ти: славно прославися Христос Бог наш.
Слава: Агнче Божий, грех мира вземый и мене ради на Кресте руцы распрострый, очисти мои руце и устне, да неосужденно сподоблюся безкровное священнодействие совершити и воспети Ти: славно прославися Христос Бог наш.
И ныне: Глаголом силы Своея содержай вселенную всю во утробу Твою сниде, Всепетая, Сего умоли, Владычице, да неосужденно предстану святейшей Трапезе и Вечери Его Тайныя причастник явлюся и купно с лики святых воспою: славно прославися Христос бог наш.

Песнь 3. Ирмос: Господь сый всех
Сердце чисто созижди во мне Боже и дух прав обнови во утробе моей.
Огнеобразная Божественнаго Духа благодать священнодействители апостолы яви, очищающи и освящающи избранныя ученики, тоюжде очисти и освяти и просвети мя, да неосужденно предстану святей Трапезе и, приим Чашу, возопию с любовию: ядите Тело Бога моего и верою утвердитеся.
Не отвержи мене от Лица Твоего и Духа Твоего Святаго не отыми от мене.
Силою свыше облекий апостолы, ныне мя, недостойнаго, во всеоружие благодати Твоея облецы, Господи, да очищен, просвещен и освящен неосужденно приступити дерзну службе сей всетаинственней, ядите, вопия, Тело Бога моего и верою утвердитеся.
Слава: Лишеннаго правды всякия и паче всех недостойнаго приими мя, Боже, и не отрини мене от отрок Твоих, но сподоби до последняго издыхания Ти служити и, воспоминание творити смерти Твоея и воскресение проповедати, ядите, вопия, Тело Бога моего и верою утвердитеся.
И ныне: Очисти мя, Спасе, Пречистыя Матери Твоея молитвами и Тоя ходатайством сподоби неосужденно предстати Святей Твоей Трапезе и священнодействовати Тайны Твоя и всем верным Твоим Сия преподати, ядите, вопия, Тело Бога моего и верою утвердитеся.

Песнь 4. Ирмос: Провидев пророк
Сердце чисто созижди во мне Боже и дух прав обнови во утробе моей.
Воспоминающи вся, яже о нас бывшая от домостроительства Твоего нам явленная и грядущая блага верою созерцающи, Твоя от Твоих Ти принести дерзаю и на великия милости Твоя уповаю, Единороднаго бо Тя, Сына, Благий очищение в мир послал есть.
Не отвержи мене от Лица Твоего и Духа Твоего Святаго не отыми от мене.
Егда приим Хлеб на Вечери, в солиле руку омочил еси купно со предателем, горесть во грехе пребывания сим знаменуя, егоже части мя избави и от грех моих очисти, да сподоблюся без осуждения Ти службу вознести, Единороднаго бо Тя, Сына, Благий очищение в мир послал есть.
Слава: Небеса приклонил еси и к человеком низшел еси, да горе возведеши древле в тление ниспадшее естество земнородных. Сего ради нам даровал еси Тело Твое Пребожественное и Кровь всечестную, да их причашщеся, живота наследие нетленнаго обрету, Единороднаго бо Тя, Сына, Благий очищение в мир послал есть.
И ныне: Нозе умыл еси на вечери благовестником, путь добрейший всем смирения показуя, темже покаянием омый скверну гордыни моея молитв ради Пречистыя Твоея Матере, Единороднаго бо Тя, Сына, Благий очищение в мир послал есть.

Песнь 5. Ирмос: Союзом любве
Сердце чисто созижди во мне Боже и дух прав обнови во утробе моей.
Архиерею истиннейший и Агнче всенепорочный, Приносяй и Приносимый и Приемляй и Раздаваемый, удовли мя силою Святаго Твоего Духа предстати Святей Твоей Трапезе и священнодействовати Святое и Пречистое Твое Тело и Честную Кровь, благовествуя всем мир.
Не отвержи мене от Лица Твоего и Духа Твоего Святаго не отыми от мене.
Господи и Творче и Царю Безсмертный, не служение прияти пришедый, но да послужиши всем во спасение, приими Жертву хваления и Службу безкровную и милостьми Твоими посети Церковь Твою, освящающую и благословляющую и благовествующую всем мир.
Слава: Освящения Источник приим Живоносная ребра Твоя, воду нетления и Кровь Божественную источающий, припадаю Ти и зову: очисти мя, Спасе, и укрепи Тайнами Твоими Святыми, да без осуждения даже до последняго моего издыхания сподоблюся Ти службу совершати, поя и благословя и благовествуя всем мир.
И ныне: Благообразный Иосиф со страхом Тело Пречистое Сына Твоего иногда плащаницею обвил есть, разум недоуменный верою укрепляющи, аз же како дерзну руку прострети и коснутися мене ради на Кресте Закланнаго и воскресением ада державу Поправшаго, и всем концем вселенныя Благовествующаго мир;

Песнь 6. Ирмос: Бездна последняя
Сердце чисто созижди во мне Боже и дух прав обнови во утробе моей.
Лестию древнею уранена Адама праотца исцелил еси язвами Твоими, Господи, темже и мя исцели от страстей душевредных причащением Пречистых Твоих Таин и от тли неведения мя возведи.
Не отвержи мене от Лица Твоего и Духа Твоего Святаго не отыми от мене.
Авелевы дары, Ноевы жертвы и Авраамова всеплодия приявый, приими ныне во благости Твоей службу сию от руки мене, грешнаго, и возниспосли благодать Всесвятаго Духа, да возмогу от сердца Ти хвалы и прошения приносити, молящеся: от тли, Боже, мя возведи.
Слава: Горе имущи сердце, благодарю Тя, Господи Боже мой, и покланяюся державе Твоей и дары о своих гресех и о людских неведениих дерзаю Ти возносити, моляся, от тли, Боже, мя возведи.
И ныне: От всех родов Избранная, Царице Дево Богородице, от Тебе Рожденнаго моли, да избавит мя от рабства греховнаго и, Тайнами Своими мя освящающи, от тли душевредныя возведет.

Кондак, глас 2.
Хлеб, Христе, взяти не презри мя, Тело Твое, и Божественную Твою ныне Кровь, Пречистых, Владыко, и Страшных Твоих Таин причаститися окаяннаго, да не будет ми в суд, да будет же ми в живот вечный и безсмертный.
Икос.
Архиерею Истиннейший, власть имеяй от века по чину Мелхиседекову, не пришедый да Ти послужат, но да Сам послужиши миру и на жертвеннице крестнем о наших гресех Жертву живожертвенную совершиши и Кровию Своею обновиши всю тварь. Темже Ти, Единому Благому и Многомилостивому приступити дерзаю и Тайны Твоя Божественныя прияти тщуся и во смирении зову: да не будет ми в суд и во осуждение, но в живот вечный и безсмертный.

Песнь 7. Ирмос Отроцы в Вавилоне
Сердце чисто созижди во мне Боже и дух прав обнови во утробе моей.
Служителя Новаго Завета и слугу Святых Твоих Таин благоволи мя явити, Господи, да без осуждения возмогу руце своя воздевати и о людех Твоих ходатайство приносити и даже до скончания века воспевати: благословен еси, Господи Боже отец наших.
Не отвержи мене от Лица Твоего и Духа Твоего Святаго не отыми от мене.
Лукавство совести очисти, Всеблагий Владыко Господи, и благодатию Твоею освяти мя, да, сподобльшеся служити без порока святому Твоему жертвеннику, обрящу мзду верных строителей в день страшный воздаяния Твоего праведнаго, поющи: благословен еси, Господи Боже отец наших.
Слава: Отроки древле не опали огнь всеразженный пещный, аз же, многогрешный, дерзаю невещественнаго Огня коснутися и Угль всенепорочный дланьми своими подъяти и со благоговением вкусити Пищи ангельския, во умилении зовущи: благословен еси, Господи Боже отец наших.
И ныне: Всякаго избави мя искушения, Владычице Дево, да очищенным умом и сердцем просвещенным дерзну ко святей службе приступити, вопиющи: благословен еси, Господи Боже отец наших.

Песнь 8. Ирмос: За законы отеческия
Сердце чисто созижди во мне Боже и дух прав обнови во утробе моей.
Егда приидеши на землю со славою, не посрами мене от чаяния моего, Боже мой, яко аще Ти Единому согрешаю, но и Тебе Единому служу, не имам прострети руце мои к богу чуждему. Темже, на милость Твою уповая, молюся: сподоби мя Тя присно пети и превозносити во вся веки.
Не отвержи мене от Лица Твоего и Духа Твоего Святаго не отыми от мене.
Немощи своя исповедую и грехи моя повергаю пред Тобою, Господи. Исцели, помилуй, ущедри раба Твоего и избави от всякия страсти душевредныя и сподоби мя, да Тя присно пою и превозношу во вся веки.
Слава: Исаия уста очисти, угль приим от серафима всеразженный, Ты же, Господи, все естество мое очисти углем Пречистых Таин Твоих, да без осуждения присно зову: Господа пойте дела и превозносите во вся веки.
И ныне: Естество человеческое обожи во Утробу Твою Пречистую снизшедый Христос Бог наш и обновил есть обветшавшее Тайнами Святых Тела и Крови Своея, темже, руце простирая и приемля Святая, во умилении пою: Господа пойте дела и превозносите во вся веки.

Песнь 9. Ирмос: Вечери Владычня
Сердце чисто созижди во мне Боже и дух прав обнови во утробе моей.
Таинственныя и всеславныя Твоея Вечери причастника днесь приими мя, Слове Божий, и сподоби мя истее Тебе, Света невечерняго и радостного, причащатися в незаходимей славе Царствия Твоего, да купно со всеми святыми Тя величаю.
Не отвержи мене от Лица Твоего и Духа Твоего Святаго не отыми от мене.
Воспоминающе вся, яже о мне бывшая, славлю, пою, благословлю Тя, Господи Боже мой, и во умилении дерзаю руце своя прострети и прияти Тайны пренебесныя, пред нимиже ангели благоговейно покланяются, Свят, Свят, Свят непрестанно зовуще и песненнолепно Тя величающе.
Воздаждь ми радость спасения Твоего и Духом Владычним утверди мя.
Освяти мя, Господи, благодатию Твоею и насыти мя Пищи небесныя, Хлебе Животный, да николиже иныя доброты возжелаю, разве Тебе, Единаго Всеблагаго и Многомилостиваго, Егоже величаю.
Слава: Радуяся и трепеща приступаю ныне святей Твоей службе и предстати дерзаю трапезе всесвятей, на нейже зрю Божественнаго Агнца, от века предъизбраннаго и мене ради закланнаго, и Своею Кровию мир от тли избавльшаго , и Себе Самаго в пищу и питие мне предложшагося, Егоже величаю
И ныне: Юзы разреши, Господи, страстей моих греховных бесстрастрастными страстьми Твоими и причастием Святых твоих Таин всего обнови, освяти и просвети мя, недостойнаго служителя твоего, да неосужденно сподоблюся истее Тебе причащатися в невечернем дни Царствия Твоего, поя, воспевая и величая Тя во вся веки.
Tags: богослужебное, гимнография, церковленно
Subscribe

  • Некоторые мысли по поводу анонсируемой автокефалии.

    В настоящий непростой период развития украинского общества все чаще и чаще стали звучать призывы о необходимости создания так называемой «Единой…

  • Кому нужен пост?

    Для чего нужен пост? Неужели Бог заглядывает на то, что лежит у человека на тарелке? Неужели Бог нуждается в наших мучениях? Неужели Бог в нужен наш…

  • Брак и монашество

    Сейчас многие пытаются противопоставить монашество и брак, размышляя, что важнее, сугубее или спасительнее... мне кажется, что такая постановка…

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 4 comments